De Fans all goot opleggt, narms Randale un veel Orange in de Stadt: Dat eerste Hamborger EM-Speel twüschen Polen un de Nedderlannen is goot över de Bühn gahn. Överall in de Stadt hebbt Fans vun de Oranjes un ut Polen tosamen fiert. En grötteren Twüschenfall geev dat op de Reeperbahn. En Mann hett Polizisten, Fans un Journalisten mit en Dackdecker-Hamer angrepen. Üm em to stoppen, müss de Polizei op em scheten. Dorna keem he na't Krankenhuus hen.
De Haven-Arbeiders in Hamborg sünd ok hüüt wedder to'n Streiken opropen, un dat gellt ok för Bremen, Bremerhaven, Braak un Emm. Ünnerstütten schall dat bi't Verhanneln över ne'e Tarife de drüdde Runn in Hamborg. De Gewarkschop ver.di will för all de Haven-Lüüd dree Euro mehr in de Stünn un en högere Schicht-Tolaag. Klock 11 geiht dat los mit en Demonstratschoons-Tog - vun de Elvphilharmonie dör de Haven-City bet na'n Bessenbinnerhoff.
In't Hamborger Raathuus fangt de Senaat vundaag an mit dree Daag Klausur-Sitten för den neegsten Huusholt. In't lopen Johr staht in den Huusholt knapp 19 Milliarden Euro för all Behöörden tosamen. De Finanzbehöörd seggt, de Utgaven för 2025 un 2026 warrt op jeedeen Fall mehr ween, un dat wegen de högeren Tarife för den öffentlichen Deenst. Ok ünner disse Ümstänn will de Senaat dat henkriegen, dat se keen Stellen wegstrieken mööt.
Wenn Staten sik Atomwapens toleggen doot, denn geiht dat vör allen üm dat Afschrecken. Un as dat utsüht, hollt dat vele Länner jümmer mehr för nödig. So is de Tahl an Nuklearwapens verleden Johr wedder anstegen. Dat sweedsche Fredensforschungs-Institut SIPRI schrifft in sien ne'en Bericht, dat geev nu weltwiet mehr as 3900 atomare Sprengköpp op Raketen un Flegers. De gröttste Deel dorvun höört de USA un Russland to.
In Düütschland föhlt sik mang de jungen Lüüd twüschen sössteihn un dörtig Johr ölven Perzent bannig eensam. Dat is bi en Ümfraag rutsuert, de vun de Gütersloher Bertelsmann-Stiftung maakt worrn is. De düütsche Familienministersch Lisa Paus, de seggt, de Eensamkeit wörr ünnerschätzt warrn. Dorüm gifft dat vunaf hüüt för ganz Düütschland en Aktions-Week, denn dit Thema wüllt se ut de Tabu-Zoon ruthalen.
Dor deit sik wat bi den Elv-Tower - denn de Hamborger Bo-Investor Dieter Becken will em köpen un an't Enn vun'n Juli-Maand dat Egenkapitaal dorför tosamenhebben. Dat sä he in en NDR-Interview. He will den Elv-Tower mit annere tosamen köpen un seggt, üm un bi de Hälft hett sik all tosamenfunnen. Un Becken hett vör, den Elv-Tower so to Enn to boen, as dat al an'n Anfang plaant weer. Gifft aver ok noch en Handvull annere, de sik för en Koop interesseern doot.
De Dag bringt vele Wulken un wenig Sünn. Hier un dor kann mal en Schuer rünnerkamen, villicht ok mit Blitz un Dunner, un dat bi bet to 21 Graad – nu (Klock negen) sünd dat in de Haven-City 14 Graad. Morgen gifft dat mehr Wulken as Sünnschien, un in’n Loop vun’n Dag kummt Regen op, bi bet to 23 Graad.
